Gazetari Elton Tozaj ka bërë një deklaratë të fortë në emisionin “Radar”, ku ka përmendur drejtpërdrejt moderatoren Luana Vjollca, duke ngritur pretendime për një rast të dyshuar dhune.
Sipas Tozajt, bëhet fjalë për një grua që ai e identifikon si pronare të një agjencie udhëtimesh, e cila dyshohet se është dhunuar pas një konflikti që lidhej me një pagesë.
“Luana Vjollca sot ka paguar lekë për të rrahur për vdekje një femër, pronaren e agjencisë së udhëtimeve, e cila e ka denoncuar”, pretendoi gazetari gjatë emisionit.
Tozaj pretendon se konflikti ka nisur pas një çështjeje që lidhej me pagesën e një bilete të blerë përmes agjencisë. Sipas versionit të tij, pronarja e agjencisë i kishte kërkuar moderatores të kryente pagesën dhe më pas, pas një mosmarrëveshjeje, kishte bërë një denoncim.
Gazetari më tej pretendoi se pas këtij denoncimi gruaja ishte dhunuar dhe e lidhi ngjarjen drejtpërdrejt me Luana Vjollcën.
Në kuadër të deklaratave të tij, Tozaj ka publikuar edhe fotografi të një gruaje ku shihen dëmtime në fytyrë dhe në pjesë të tjera të trupit, duke pretenduar se ajo është personi i përfshirë në ngjarje.
Megjithatë, deri në këtë moment, nuk ka një konfirmim zyrtar nga Policia e Shtetit, Prokuroria apo ndonjë institucion tjetër që të vërtetojë pretendimet e gazetarit apo përfshirjen e Luana Vjollcës në këtë ngjarje.
Edhe fotografitë e publikuara nuk mund të përcaktojnë vetë se kush i ka shkaktuar dëmtimet apo rrethanat në të cilat ato janë shkaktuar.
Deri tani, Luana Vjollca nuk ka bërë një reagim publik lidhur me pretendimet e ngritura ndaj saj. Për rrjedhojë, deklaratat e Elton Tozajt mbeten pretendime të bëra publikisht dhe nuk duhet të konsiderohen si fakte të konfirmuara.
