Kryeministri Edi Rama ka deklaruar në një intervistë për gazetën greke “Kathimerini” se nuk ka ndërmend të largohet nga drejtimi i vendit, pavarësisht protestave që kanë përfshirë Tiranën javët e fundit.
I pyetur nëse ka në plan të japë dorëheqjen, Rama është përgjigjur prerë, duke theksuar se ndryshimi i qeverisë duhet të ndodhë përmes zgjedhjeve dhe jo përmes dhunës.
“Jo. Në një demokraci, qeveritë ndryshojnë përmes zgjedhjeve, jo përmes bombave molotov. Populli shqiptar na dha një mandat të qartë vitin e kaluar dhe unë synoj ta përmbush atë”, është shprehur kryeministri.
Gjatë intervistës, Rama ka folur edhe për kërkesat e studentëve për arsim më të mirë, luftë kundër korrupsionit dhe ulje të kostos së jetesës. Ai ka pranuar se shqetësimet e të rinjve janë të bazuara dhe se kërkojnë përgjigje konkrete.
“Nuk kam pretenduar kurrë se gjithçka në Shqipëri është bërë siç duhet. Nuk mendoj se të rinjtë duhet thjesht të pranojnë atë që kemi arritur deri më sot”, ka deklaruar ai.
Rama ka paralajmëruar gjithashtu se buxheti i vitit 2027 do të përfshijë masa shtesë për familjet, shërbimet publike dhe studentët. Sipas tij, ai ka ftuar studentë dhe pedagogë në një dialog të hapur dhe është i gatshëm të shqyrtojë propozime serioze, edhe nga kritikët e qeverisë.
Megjithatë, kryeministri ka bërë një dallim mes studentëve që protestojnë për një të ardhme më të mirë dhe personave që, sipas tij, përdorin dhunën për të arritur qëllime politike. Ai ka përmendur edhe individë që pretendon se kanë lidhje me lëvizjen Antifa, duke i akuzuar disa protestues për sulme ndaj ndërtesave publike dhe dëmtim të pronës private.
“Çdokush mund të kërkojë dorëheqjen time; kjo është pjesë e jetës demokratike. Askush nuk ka të drejtë ta imponojë atë me dhunë”, ka theksuar Rama.
Në përfundim, kreu i qeverisë ka përsëritur se synon të vazhdojë punën për integrimin e Shqipërisë në Bashkimin Evropian dhe se nuk do të largohet nga detyra për shkak të presionit të protestave.
Deklaratat e tij vijnë në një klimë tensionesh politike, ndërsa kërkesat e studentëve dhe reagimi i qeverisë mbeten në qendër të debatit publik.

