Breaking News:

Kush e “tradhëtoi” kryeministrin? Tjetër emër në listën e Ramës kundërshton të dhënat, çfarë ndodh tani? 

Advertisements

Dy raste të publikuara nga kryeministri Edi Rama gjatë deklaratës së tij për protestat studentore kanë ngritur pikëpyetje mbi saktësinë e informacioneve të paraqitura për personat e shoqëruar nga policia.

Gjatë daljes së tij publike, Rama prezantoi një listë me fotografi, iniciale, mosha dhe të dhëna për precedentë penalë të pretenduar, duke argumentuar se mes personave të përfshirë në përplasjet me policinë kishte edhe individë me të kaluar kriminale dhe jo vetëm studentë.

Advertisements

Megjithatë, disa orë pas publikimit, dy prej personave të përmendur kundërshtuan informacionet që ishin bërë publike për ta.

Rasti i parë është ai i Jon Sinoymerit, 20-vjeçarit me inicialet J.S., i cili në materialin e paraqitur nga kryeministri u identifikua si person që nuk ishte student dhe që kishte precedent për prodhim dhe shitje të lëndëve narkotike.

Sinoymeri doli publikisht gjatë protestës dhe deklaroi se është student i Universitetit të Mjekësisë, me mesatare 10.0. Ai tregoi edhe rezultatet e tij universitare, ndërsa mohoi të kishte precedentë penalë. Sipas versionit të tij, shoqërimi i vetëm në polici kishte ndodhur pas pjesëmarrjes në protestë, ku pretendon se ishte mbajtur për rreth shtatë orë e gjysmë përpara se të lirohej.

Një tjetër rast i kontestuar është ai i Ergys Llanajt. Politikani Adriatik Lapaj kundërshtoi përshkrimin e tij si person me precedentë penalë, duke deklaruar se arrestimi i mëparshëm ishte vlerësuar i paligjshëm nga gjykata dhe se procedimi ishte pushuar, pasi, sipas tij, ishte konstatuar se fakti penal nuk ekzistonte.

Lapaj e përshkroi Llanajn si ish-ushtarak me 18 vite përvojë, doktor shkencash dhe person që kishte pasur certifikata sigurie të NATO-s.

Pas këtyre kundërshtimeve, vëmendja është zhvendosur te mënyra se si është përgatitur materiali i prezantuar nga kryeministri.

Sipas një raportimi të Vox News, dosja është hartuar nga zyrtarë të kabinetit të Ramës në bashkëpunim me strukturat ligjzbatuese. Media pretendon, duke iu referuar burimeve të saj, se kryeministri ka kërkuar shpjegime nga bashkëpunëtorët për informacionet që janë kundërshtuar publikisht.

Deri tani, mbetet për t’u sqaruar se nga cilat dokumente janë marrë të dhënat, nëse ato janë interpretuar saktë dhe nëse ka pasur gabime gjatë përgatitjes së listës. Kundërshtimet e dy personave ngrenë pikëpyetje mbi informacionet e publikuara, por rrethanat kërkojnë verifikim të mëtejshëm përpara se të nxirren përfundime.