Prej disa ditësh, rrjetet sociale po ziejnë nga pretendimet për një përplasje fizike mes Joz Markut dhe Edi Kuçit.
Në mes të këtyre zërave, një video e publikuar së fundmi ka rikthyer edhe më shumë vëmendjen te dy ish-banorët e “Big Brother VIP Albania”.
Gjithçka nisi pas disa transmetimeve “live” të personazhit të njohur si “Fire”, i cili pretendoi se kishte informacione për atë që kishte ndodhur dhe se kishte parë edhe një video të përballjes. Sipas versionit të tij, mes Jozit dhe Edit kishte pasur një konflikt fizik, ku Edi ishte goditur.
Ndërkohë, Indeksonline ka publikuar një video të siguruar prej saj, ku Edi Kuçi shfaqet në Tiranë me një fashë të vendosur në kokë. Sipas medias, pamjet janë regjistruar ditën e enjte.
Prania e fashës ka bërë që videoja të lidhet menjëherë në rrjet me pretendimet për përplasjen me Jozin. Megjithatë, fasha në kokën e Edit nuk përbën provë se dëmtimi ka ardhur si pasojë e një konflikti me Joz Markun.
Deri tani nuk dihet se çfarë i ka ndodhur konkretisht Edit, kur është dëmtuar apo në çfarë rrethanash ka marrë dëmtimin.
As Joz Marku dhe as Edi Kuçi nuk kanë dhënë deri tani një version publik për ngjarjen.
Për rrjedhojë, mbetet ende e paqartë nëse dëmtimi i Edit ka ndonjë lidhje me përplasjen e pretenduar apo bëhet fjalë për një situatë krejt tjetër.
