Detaje të reja kanë dalë në dritë nga tragjedia familjare që tronditi shtetin e Michiganit, ku Kristopher Karolkiewicz, 47 vjeç, dyshohet se vrau bashkëshorten e tij, Amanda “Mandy” Karolkiewicz, dhe fëmijët e tyre, përpara se t’i jepte fund jetës.
Pas ngjarjes, janë zbuluar postime të mëparshme të Amandës në platformën Reddit, ku ajo kishte rrëfyer problemet që përjetonte në martesë dhe kishte pranuar se kishte vënë re prej kohësh “shenja të kuqe” në sjelljen e bashkëshortit.
Në postimet e saj, Mandy shkruante se burri i saj kishte pasur një lidhje jashtëmartesore me një praktikante në vendin e punës dhe e përshkruante si manipulues, të pabesueshëm dhe, në disa raste, edhe të dhunshëm fizikisht.
Ajo rrëfente se ishte e frikësuar nga ideja e divorcit, ndërsa theksonte se qëndronte në martesë për hir të fëmijëve.
“Ai ka pasur gjithmonë shenja të mëdha paralajmëruese, por unë i injorova,” kishte shkruar ajo në një nga postimet.
Tragjedia ndodhi më 24 korrik në banesën e familjes në Grand Haven, Michigan. Autoritetet gjetën të pajetë çiftin dhe fëmijët e tyre, të moshave nga 5 deri në 15 vjeç.
Sipas autoriteteve, ngjarja po hetohet si një vrasje e shumëfishtë e ndjekur nga vetëvrasja. Sherifi i zonës, Eric DeBoer, e cilësoi rastin si “një tragjedi të papërshkrueshme që mund të mos kuptohet kurrë plotësisht.”
Amanda Karolkiewicz punonte si mësuese dhe kujtohet nga kolegët si një person që kujdesej jashtëzakonisht shumë për nxënësit e saj.
